2011年成立的陳校長免費補習天地為基層兒童免費補習，以及提供才藝班課程，讓他們可以得到一個平等的學習機會。
大家口中的「陳校長」正是機構創辦人陳葒，一個因看見教育生態普遍忽略弱勢學生的學習權益，於是毅然辭去中學校長一職，成立這個提供義務補習（義補）的非牟利機構「陳校長免費補習天地」，讓基層學生可以享有平等學習的權利，減輕跨代貧窮的問題，做到真正「因材施教」、「有教無類」。
是次訪問由陳校長免費補習天地行政主任黃慧寶小姐與社職分享陳校長免費補習天地的主要服務，以及分享數碼轉型的看法。
「我哋服務主要有三大範疇，包括係一對一免費補習、學前班和才藝課程。主要服務對象係基層學生，包括拎緊綜援或全額書簿津貼嘅學生。」
義務補習需要大量義務導師（義師）作為提供服務的媒介，黃慧寶小姐表示機構一直透過不同渠道招募義師，尤其會到學校宣傳。當時，有些學校老師向機構推介社職平台，可以招募不同院校的大學生加入成為義師。
「當時我哋覺得呢個平台好吸引，因為我哋正需要有心人士加入機構做義師。所以喺2017年開始，我哋就開始透過社職平台招募義師。」
黃慧寶小姐憶述使用社職平台招募義師的反應不錯，平均每月都可以招募到40位義師加入團隊，直至現在（2021年尾），差不多招募了1900名義師。
透過社職成功招募義師，陳校長免費補習天地同時亦使用社職整合不同會員的資料，加強通訊效率。
「我哋嘅學生人數都幾多，以一對一補習嚟講，其實都有16000幾個學生成功配對；另外，才藝班學生都有5000幾個。再加上義師同學生人數相近。透過SRM（非牟利機構持份者關係管理系統）就可以統一整合我哋嘅學生、義師、家長嘅資料，唔需要分開每一個系統查閱。除咗記錄會員資料之外，亦可以幫助記錄佢哋嘅出席情況。」
面對龐大的學生數量和義師數量，黃慧寶小姐非常重視數據如何協助機構向會員進行宣傳工作，提高服務成效。
「知道學生參與嘅課程類別，睇到佢哋嘅興趣，我哋再提供相關嘅課程。另外，更加清楚義師嚟自咩界別（學生、在職人士或退休人士），可以做一啲針對性宣傳。而我哋透過呢個平台（社職）發放資訊時，義師同學生都可以好快知道我哋嘅資訊，咁樣可以加強我哋之間嘅溝通。」
黃慧寶小姐坦言社職讓他們多了一個渠道接觸大眾。
「現今時代，特別講求數碼化。搵義工同服務，好多時候都靠上網搜尋。而我哋發現所招募嘅義師都係嚟自唔同界別，代表呢個平接觸到唔同群體嘅市民，幫助我哋機構服務。」
提及到數碼化，黃慧寶小姐表示數碼轉型對陳校長免費補習天地非常重要。
「數碼轉型對我哋機構好重要，包括可以好迅速咁將資訊傳遞到我哋嘅服務使用者。例如疫情期間，我哋唔想因為停課而影響學生學習，所以我哋推行網上學習課程。而且，亦可以更快回應贊助人一啲需要和要求。可能贊助人對於我哋嘅服務都有好多唔同嘅期望，我哋希望可以透過更一啲更加數碼化嘅資料，更快回應到贊助人嘅一啲提問和查詢。」
後記：
疫情期間，學生停課的安排讓不少家長手忙腳亂，而陳校長免費補習天地亦迅速採取應變措施，不但推行網上課程，亦加強課室消毒，確保學生和義師可以舒適且安心上課。訪問當日（上年年尾），不少小朋友對拍攝感到非常好奇，更想爭先出鏡，但所有同學仔依然遵從義師和中心同事的吩咐，有秩序地回課室上堂。黃慧寶小姐更向社職逐一簡介每個課室的課程內容，以及分享贊助人所捐贈的數碼器材如何協助義師加強課堂互動。當然，亦不少得再次多謝各界義師的幫助，讓機構可以為基層學生提供義務補習。
社職也多謝陳校長免費補習天地的黃慧寶小姐、中心同事、義師和學生協助是次拍攝！
相關連結：
繼續閱讀：
.png)
%20(1).png)
