做運動令身體釋放腦內分泌物－安多酚（Endorphin），有助控制情緒及調節免疫系統細胞。當運動變成一種習慣，絕對有助改善身體狀況及加強自信心；最重要係提升專注力、亦會令你瞓得好啲，自然有Good Mood！如果返工無時間去Gym Room，一於放工選擇行多啲，郁多啲亦可以。

你個大腦需要各種營養先可以function得好，選擇食多啲堅果（杏仁、核桃、腰果和花生）、牛油果、豆、水果、蔬菜、充滿Omega-3食物以及飲夠水！而且，請你盡量避免吸收過量咖啡因、飲太多高糖飲品及酒精。（如有其他疾病需要指定飲食習慣，記得聽返醫生講。）

飲酒Relax，明白嘅，最緊要識得點到即止。

但若果你因為感到恐懼、孤獨而飲酒，你只會越飲越寒、越飲越Lonely。最慘係當酒精散晒後，你會感到更加空虛、容易越飲越多、更依賴酒精，進入無限輪迴……然後，你重要面對宿醉帶嚟嘅各種身體不適，身心只會更加唔舒服、更攰。所以，絕對唔建議用酒去控制情緒。

唔好匿埋唔見人，有人愛你！

充滿愛嘅家庭及朋友係你嘅強大後盾，佢哋對你嘅支持相當重要、甚至同你分享另一種睇法去了解世事或你個腦、一齊諗方法解決問題等。要好好同佢哋保持聯絡，就算唔可以見面，你都可以打電話、開個Facetime或Telegram傾下偈、吹吹水、自然feel good！記得你係要同Supportive嘅朋友保持聯絡，而唔係傷害你精神健康嘅朋友。你有得揀，都要識得揀！

「人比人，比死人」。每個人都係獨立個體，總有自己嘅專長同短處，嘗試接受自己嘅能力、鼓勵自己學新嘢。與其日日上Social Media睇其他人生活有幾精彩，不斷比較搞到傷自尊心，不如花多啲時間增值自己。世界其實好大，出去擴闊眼界；做返自己，自然識到志同道合朋友。

而且無人係超人，抗壓力係有限制。如果覺得自己頂唔順，記得搵人幫手－搵屋企人、搵朋友、搵志願團體、搵本地機構等。求助唔係一種軟弱行為，而係一種勇氣，因為你肯面對眼前呢個難題，亦願意去克服。

相關推介：

照顧者支援平台

婦女求助熱線

當情緒波動時，畀自己一個Break。

5分鐘深呼吸練習又好、15分鐘飲杯水亦好、30分鐘睇套劇都好，暫時畀自己靜一下，搵其他嘢做或離開目前地方，畀自己減下壓，享受「Me Time」，做自己鍾意、勝任嘅事，自然享受亦做得開心。有時欣賞自己、讚下自己做得好，係應該的。如果真係太攰，不如恰一恰，充足電再繼續上路。

相關推介：

5個手機APP練習靜觀

ASMR Youtube影片推介

文學散步

幫人，其實係幫緊自己。你可以透過義工活動走入社區，幫助有需要人士，同時亦可以認識新朋友。

例如你領養咗一隻貓，倒頭來可能係佢領養咗你；

例如你去狗場做義工或貓舍做義工，自然識到愛狗之人或貓奴；而且你用愛對毛孩，毛孩亦會對你表達愛。

唔好因為自己精神健康差而睇少自己，你肯幫自己，自然有人會幫你。

相關文章：

【精神健康】4個減壓方法，保持身心靈健康！｜你會否有常見的精神健康警號？

【家長篇】為何需要關注青少年的心理健康？父母需要注意的情緒警號

【Self-Care活動】7個促進精神健康的自我照顧日常習慣

4個照顧自己和身邊人的生活貼士｜實現SDG目標3：良好的健康與福祉

【拯救動物】動物義工有幾多種？一定唔只貓義工、狗義工

其他有關「精神健康」的文章

關心自己體重之餘

亦都要留意自己嘅精神健康

錫自己多啲啦

香港人